Árið 2011 var einstaklega viðburðaríkt í rekstri Kaupfélags Steingrímsfjarðar. Miklar framkvæmdir og endurskipulagning rekstrar voru einkennandi sem voru miðaðar að því að styrkja rekstur félagsins og ná fram hagræðingum. Eins og sést á uppgjöri ársins þá höfum við ekki enn náð fram tilætlaðri hagræðingu. Tap er á öllum deildum fyrir sameiginlegan kostnað að pakkhúsinu undanskyldu. Aðalverslunin á Hólmavík skilaði 13.170 þús. kr. tapi en hagnaður af rekstri verslunarinnar var 3.480 þús. kr. árið 2010. Útibúið á Norðurfirði, sem var með 1.449 þús. kr. hagnað árið 2010 var í ár með 40 þús. kr. tap. Afkoma útibússins á Drangsnesi var nú 935 þús. kr. tap en var árið áður 667 þús. kr. tap. Söluskálinn var með 446 þús. kr. hagnað árið 2010 en þar sem rekstur hans var sameinaður aðalverslun á árinu 2011 kemur hann ekki fram í ársreikningi ársins. Pakkhúsið var á árinu 2011 rekið með 5.210 þús. kr. hagnaði en tap ársins 2010 var 329 þús. kr. Tap af rekstri móðurfélagsins var á árinu 20.322 þús. kr. en samstæðan er gerð upp með 14.053 þús. kr. hagnaði samanborið við 60.501 þús. kr. hagnað árið 2010. Eiginfjárstaða félagsins í lok árs 2011 er 262.899 þús. kr.

Ársreikningurinn er samstæðureikningur þar sem Kaupfélag Steingrímsfjarðar á 50% hlutafjár í Hólmadrangi ehf. Líkt og undanfarin ár var ágætis gangur hjá Hólmadrangi ehf. Hagnaður er af rekstri félagsins þriðja árið í röð og þrátt fyrir samdrátt í framleiðslu aukast rekstrartekjur á milli ára, en framleiðsluverðmæti ársins 2011 var 2,6 milljarðar króna og hagnaður ársins nam tæpum 68 milljónum króna.

Eins og gefur að skilja er niðurstaða rekstrar Kaupfélagsins á síðasta ári vonbrigði. Með sameinuðum rekstri aðalverslunar og söluskála var ætlunin að ná fram hagræðingu með aukinni samnýtingu þessara rekstrareininga og ná fram aukinni veltu með lengri opnunartíma og þeirri staðreynd, að fleiri viðskiptavinir skili sér inn í verslunina. Áætlanir um veltuaukningu hafa að mestu leiti staðist, fleiri viðskiptavinir heimsækja verslunina og þjónustan hefur verið stóraukin. Hins vegar höfum við ekki náð jafnvægi í hagræðingaraðgerðum, nokkuð sem er áríðandi að náist sem fyrst. Viðsnúningur hefur verið í rekstri pakkhúss á liðnum árum. Endurskipulagningin sem gerð var þar árið 2010 hefur sitt að segja í þeirri veltuaukningu sem hefur átt sér stað þar undanfarin tvö ár en einnig hefur pakkhúsið tekið yfir þjónustu við bensínsjálfsala og nýtur þar af leiðandi tekna þar um.

Frá síðasta aðalfundi hefur Þórunn Einarsdóttir látið af störfum eftir að hafa verið verslunarstjóri söluskála frá 1992. Ég vil færa henni þakkir fyrir sín störf og óska henni velfarnaðar á öðrum vettvangi. Öðru starfsfólki félagsins vil ég þakka góð störf á liðnu ári, saman eigum við verkefni að vinna sem ég fulla trú á að við leysum vel úr hendi og horfum til framtíðar full bjartsýni.

Hólmavík, 12. apríl 2012

Jón Eðvald Halldórsson

Aðalfundur Kaupfélags Steingrímsfjarðar verður haldinn miðvikudaginn 2. maí næstkomandi á Café Riis kl. 17:00.

Dagskrá:

1. Fundarsetning og kosning starfsmanna fundarins
2. Skýrsla stjórnar
3. Skýrsla kaupfélagsstjóra og lagðir fram reikningar
4. Umræður um skýrslur og reikninga
5. Afgreiðsla reikninga og ákvörðun um ráðstöfun hagnaðar ársins
6. Ákvörðun um laun stjórnar og fulltrúa á aðalfundi
7. Ákvörðun um úthlutun í Menningarsjóð Kaupfélags Steingrímsfjarðar
8. Erindi úr deildum
9. Tillögur um breytingar á samþykktum Kaupfélags Steingrímsfjarðar
10. Önnur mál
11. Kosningar
    1. Aðalmaður í stjórn úr Norðurdeild til þriggja ára í stað Óskars Torfasonar
    2. Varamaður í stjórn úr Norðurdeild til þriggja ára í stað Friðgeirs Höskuldssonar
    3. Aðalmaður í stjórn til þriggja ára í stað Guðbrands Sverrissonar
    4. Varamaður í stjórn til þriggja ára í stað Bryndísar Sveinsdóttur
    5. Fulltrúi í stjórn Menningarsjóðs K.S.H. til þriggja ára í stað Jóns E. Alfreðssonar
    6. Skoðunarmaður til tveggja ára í stað Jóns E. Alfreðssonar
    7. Varaskoðunarmaður til tveggja ára í stað Jóns Gísla Jónssonar

Kaupfélag Steingrímsfjarðar auglýsir hér með aðalfundi deilda félagsins sem haldnir verða dagana 17.-19. apríl næstkomandi. Fundastaðir og tíma viðkomandi deilda eru eftirfarandi:

Aðalfundur Norðurdeildar: Þriðjudaginn 17. apríl kl. 17:00 á kaffistofu Fiskvinnslunnar Drangs ehf.

Aðalfundur Suðurdeildar: Miðvikudaginn 18. apríl kl. 17:00 á Sauðfjársetri á Ströndum, Sævangi.

Aðalfundur Miðdeildar: Fimmtudaginn 19. apríl kl. 11:00 á skrifstofu Kaupfélagsins.

Þá er aðalfundur Kaupfélags Steingrímsfjarðar fyrirhugaður þann 2. maí næstkomandi kl. 17:00 á Café Riis.

Kaupfélag Steingrímsfjarðar auglýsir laust til umsóknar starf í byggingavörudeild félagsins á Hólmavík.

Um er að ræða fjölbreytt og krefjandi starf í líflegu umhverfi, þar sem helstu verkefni eru:

• Afgreiðsla og þjónusta við viðskiptavini
• Pantanir og samskipti við birgja
• Viðhald
• Ábyrgð á birgðaeftirliti á eldsneytisdælum

Æskilegt er að starfsmaður hafi víðtæka reynslu úr ýmsum atvinnugreinum og hafi réttindi til stjórnunar lyftara. Rík þjónustulund, skipulag og góð samskiptahæfni eru eiginleikar sem starfsmaður þarf að búa yfir.

Frestur til umsókna er til kl. 16:00 föstudaginn 20. apríl næstkomandi. SKila skal umsóknum, ásamt ferilskrá, á skrifstofu Kaupfélagsins eða á netfangið Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. .

Nánari upplýsingar um starfið veita Hjörtur, verslunarstjóri í pakkhúsi (455 3106), eða Jón Eðvald, kaupfélagsstjóri (455 3101).